റമദാനിൽ ഗരങ്കാവോ ആഘോഷ രാത്രികൾക്കായി ഖത്തർ ഒരുങ്ങുന്നു, വിവിധ വേദികളെക്കുറിച്ചറിയാം

ദോഹ, ഖത്തർ: വിശുദ്ധ റമദാൻ രണ്ടാഴ്ചയോട് അടുക്കുകയും വസന്തകാലം ആരംഭിക്കുകയും ചെയ്യുമ്പോൾ ഖത്തറിലുടനീളം കുട്ടികളും യുവാക്കളും ഗരങ്കാവോ ആഘോഷങ്ങൾക്കായി ഒരുങ്ങുന്നു.

കുട്ടികൾ വീടുതോറും നീങ്ങുകയും മെലഡികൾ പാടുകയും മധുരപലഹാരങ്ങളും മറ്റും ശേഖരിക്കുകയും ചെയ്യുന്ന സജീവമായ ഒരു പാരമ്പര്യമാണ് ഗരങ്കാവോ.

വിശുദ്ധ മാസത്തിൻ്റെ പകുതി വ്രതാനുഷ്ഠാനത്തിന് ശേഷം റമദാൻ 14-ാം ദിവസം കുട്ടികൾ ഗരങ്കാവോ ആഘോഷിക്കുന്നു.

വരാനിരിക്കുന്ന രണ്ട് ദിവസങ്ങളിൽ ഖത്തറിൽ ഗരങ്കാവോ ആഘോഷിക്കാൻ പറ്റിയ സ്ഥലങ്ങൾ നമുക്ക് പരിചയപ്പെടാം.

ദോഹ എക്സ്പോയിലെ ഗരങ്കാവോ നൈറ്റ്

ദോഹയിലെ അൽ ബിദ്ദയിലെ എക്‌സ്‌പോ 2023ൽ കുട്ടികൾക്കായി വിവിധ പരിപാടികളുമായി ഗരങ്കാവോ ആഘോഷിക്കും. ഫാമിലി സോണിലെ എക്‌സ്‌പോ സ്‌കൂൾ നാളെ (മാർച്ച് 24) വൈകുന്നേരം 6 മണി മുതൽ അർദ്ധരാത്രി വരെ വിവിധ പരിപാടികൾ സംഘടിപ്പിക്കും.

മുനിസിപ്പാലിറ്റികളിലുടനീളം ആഘോഷങ്ങൾ

ആഘോഷത്തോടനുബന്ധിച്ച് വിവിധ മുനിസിപ്പാലിറ്റികൾ നിരവധി പരിപാടികൾ സംഘടിപ്പിക്കുമെന്ന് പ്രഖ്യാപിച്ചു.

മാർച്ച് 23 തിങ്കളാഴ്ച ദോഹ മുനിസിപ്പാലിറ്റി പൊതുജനങ്ങൾക്കായി ന്യൂ സലാറ്റ പാർക്കിൽ രാത്രി 8 മണി മുതൽ ഗരങ്കാവോ ആഘോഷപരിപാടി നടത്തും.

ദോഹ എക്‌സ്‌പോ 2023-ലെ ഫാമിലി സോൺ ഏരിയയിൽ രാത്രി 8:30 മുതൽ അൽ റയാൻ മുനിസിപ്പാലിറ്റി സമാനമായ പരിപാടി സംഘടിപ്പിക്കും.

അതേസമയം, മാർച്ച് 24 ചൊവ്വാഴ്ച, അൽ ഖോറും അൽ സഖിറ മുനിസിപ്പാലിറ്റിയും രാത്രി 8 മണിക്ക് അൽ ഖോറിലെ ഐൻ ഹ്ലീതൻ സൂഖിൽ ഗരങ്കാവോ പ്രവർത്തനങ്ങൾ നടത്തും.

ദർബ് അൽ സായിയിലെ ഗരങ്കാവോ മാർക്കറ്റ്

ഉം സലാലിലെ ദർബ് അൽ സായി ആസ്ഥാനത്തുള്ള ഗരങ്കാവോ മാർക്കറ്റ് രാജ്യത്തെ ഗരങ്കാവോ ആഘോഷങ്ങൾ നടക്കുന്ന വേദികളിലൊന്നാണ്. മാർച്ച് 24 വരെ ഗരങ്കാവോക്കാവശ്യമായ വിവിധതരം സാധനങ്ങളും ഭക്ഷണങ്ങളും അതിലേറെയും പ്രദർശിപ്പിക്കുന്ന 80 സ്റ്റോറുകളെങ്കിലും അടങ്ങുന്ന ഒരു മാർക്കറ്റ് ഈ സൈറ്റിലുണ്ട്.

ലുസൈൽ ബൊളിവാർഡ്

1.3 കിലോമീറ്റർ ദൈർഘ്യമുള്ള ലുസൈൽ ബൊളിവാർഡിൽ 2024 മാർച്ച് 24 ന് രാത്രി 8 മുതൽ അർദ്ധരാത്രി 12 വരെ ഗരങ്കാവോയ്‌ക്കായി വിവിധ പരിപാടികൾ ഉണ്ടായിരിക്കുമെന്ന് സംഘാടകർ അവരുടെ സോഷ്യൽ മീഡിയയിൽ അറിയിച്ചു.

കത്താറയിലെ ഗരങ്കാവോ നൈറ്റ്

രാജ്യത്തിൻ്റെ സാംസ്കാരിക കേന്ദ്രമായ കത്താറ നാളെ സന്ദർശകർക്ക് രസകരമായ സായാഹ്നം വാഗ്ദാനം ചെയ്യുന്നു. സമ്മാനങ്ങൾ ഉൾപ്പെടെയുള്ള ആഘോഷങ്ങൾ രാത്രി 8:30 മുതൽ വിസ്ഡം സ്ക്വയറിലാണ് നടക്കുക. മാർച്ച് 24 വരെ തുടരുന്ന ആഘോഷപരിപാടികൾ ആസ്വദിക്കാനായി കത്താറ ഹിൽസ് സന്ദർശിക്കാൻ താമസക്കാരെയും പൗരന്മാരെയും ക്ഷണിക്കുന്നു.

അൽ ഷഖാബിലെ റമദാൻ രാത്രികളും ഗരങ്കാവോയും

കുട്ടികൾക്ക് അവരുടെ സാധനങ്ങൾ ശേഖരിക്കുന്നതിനുള്ള ഗരങ്കാവോ ബാഗുകൾ അലങ്കരിക്കാനുള്ള ഒരു സുപ്രധാന ഗരങ്കാവോ ആഘോഷം അൽ ഷഖാബിലെ ലോംഗൈൻസ് ഇൻഡോർ അരീന സംഘടിപ്പിക്കും.

മികച്ച ഗരങ്കാവോ വസ്ത്രധാരണ മത്സരത്തിനും കുട്ടികളുടെ സ്റ്റേജ് ആക്ടിവിറ്റികൾക്കും അരീന ആതിഥേയത്വം വഹിക്കും.

മനോഹരമായ ആഘോഷപരിപാടികളിൽ പങ്കെടുക്കാൻ കുട്ടികൾക്ക് അവസരം ലഭിക്കുമെന്ന് സംഘാടകർ അറിയിച്ചു. രാത്രി 8 മുതൽ 12 വരെ ഗരങ്കാവോ ആഘോഷപരിപാടികൾ നടക്കും.

ഓൾഡ്‌ ദോഹ തുറമുഖത്ത് ആഘോഷങ്ങൾ

ഓൾഡ്‌ ദോഹ തുറമുഖം അല്ലെങ്കിൽ മിന ജില്ലയിൽ നാളെ വൈകുന്നേരം 6 മുതൽ രാത്രി 11 വരെ ആഘോഷങ്ങളുടെ ഒരു നിര തന്നെ സന്ദർശകർക്കായി ഒരുക്കും.

Content Highlights: List of Garangao festivities in Qatar