ദോഹ: ലോകമെമ്പാടുമുള്ള കോവിഡ് വാക്സിനേഷൻ വിവരങ്ങൾ ക്രോഡീകരിച്ച് “ഡാറ്റ മൈ വേൾഡ്” എന്ന ശാസ്ത്ര ഓൺലൈൻ പ്രസിദ്ധീകരണം പുറത്തിറക്കിയ കണക്കിൽ ഏറ്റവും കൂടുതൽ ഒരു ഡോസ് വാക്സിൻ നൽകിയ രാജ്യങ്ങളിൽ ഖത്തർ ലോകത്തിൽ തന്നെ രണ്ടാം റാങ്ക് നേടിയിരിക്കുകയാണ്. ഒരു മില്യണിലധികം ജനസംഖ്യയുള്ള രാജ്യങ്ങളെയാണ് കണക്കിൽ ഉൾപ്പെടുത്തിയിരിക്കുന്നത്.
ദേശീയ കോവിഡ് വാക്സിനേഷൻ പ്രോഗ്രാം ആരംഭിച്ചതിനുശേഷം 4,230,000-ലധികം വാക്സിൻ ഡോസുകൾ ഖത്തറിനു നൽകാൻ സാധിച്ചു. അതിൽ മൊത്തം ജനസംഖ്യയുടെ 79.8 ശതമാനം പേർക്ക് കുറഞ്ഞത് ഒരു വാക്സിൻ ഡോസ് ലഭിച്ചതായി പൊതുജനാരോഗ്യ മന്ത്രാലയം അടുത്തിടെ വെളിപ്പെടുത്തിയിരുന്നു.
ഒരു ദശലക്ഷത്തിലധികം ജനസംഖ്യയുള്ള രാജ്യങ്ങളിൽ 68.9 ശതമാനം ജനങ്ങൾക്ക് രണ്ട് വാക്സിൻ ഡോസുകൾ ലഭിച്ച രാജ്യങ്ങളിലൊന്നായ ഖത്തർ പൂർണ്ണമായി പ്രതിരോധ കുത്തിവയ്പ് എടുക്കുന്ന ജനസംഖ്യയുടെ ശതമാനത്തിൽ ലോകത്തിൽ അഞ്ചാം സ്ഥാനത്താണുള്ളത്.
ഖത്തറിന്റെ പ്രതിരോധ കുത്തിവയ്പ്പ് പദ്ധതിയുടെ വിജയമാണിതെന്നും സമൂഹത്തിന്റെ വലിയ പിന്തുണയ്ക്ക് നന്ദി അറിയിക്കുന്നുവെന്നും പൊതുജനാരോഗ്യ മന്ത്രാലയം വ്യക്തമാക്കി.
എന്നിരുന്നാലും, പ്രതിരോധ കുത്തിവയ്പ്പ് അംഗീകരിക്കാത്ത വാക്സിൻ അർഹതയുള്ള ഒരു ചെറിയ ജനസംഖ്യ ഇപ്പോഴും ഉണ്ടെന്ന് മന്ത്രാലയം വെളിപ്പെടുത്തി.
ഖത്തറിലും ലോകമെമ്പാടുമുള്ള ജനതക്ക് ഡെൽറ്റ വകഭേദം വലിയ ഭീഷണി ഉയർത്തുന്നതിനാൽ കഴിയുന്നത്ര ആളുകൾക്ക് പ്രതിരോധ കുത്തിവയ്പ്പ് നൽകേണ്ടത് വളരെ പ്രധാനമാണെന്ന് മന്ത്രാലയം പറഞ്ഞു. ഇതുവരെ പ്രതിരോധ കുത്തിവയ്പ്പ് എടുക്കാത്ത ആളുകളോട് മന്ത്രാലയം വാക്സിൻ എടുത്ത് കോവിഡിനെ തോൽപ്പിക്കുന്നതിനായുള്ള യജ്ഞത്തിൽ തങ്ങളുടെ പങ്ക് വഹിക്കാൻ ആവശ്യപ്പെടുകയും ചെയ്തു.
വാട്സ്ആപ്പ് ബ്രോഡ്കാസ്റ്റ് ലിസ്റ്റിൽ അംഗമാവാൻ SUBSCRIBE ബട്ടൺ ക്ലിക്ക് ചെയ്യുക.